‘தமிழ்நாடு பின்னலாடை வாரியம்’ அமைக்கும் திட்டம் எப்போது? எதிர்பார்ப்பில் தொழில்துறையினர்

பின்னலாடைத் தொழில்துறையை மேம்படுத்தும் நோக்கில் அறிவிக்கப்பட்ட ‘தமிழ்நாடு பின்னலாடை வாரியம்’ அமைக்கும் திட்டம் இன்னும் நடைமுறைக்கு வராததால், திருப்பூர் பின்னலாடைத் தொழில்துறையினர் அதன் செயல்பாட்டை எதிர்பார்த்துக் காத்திருக்கின்றனர்.

நாட்டின் முக்கிய பின்னலாடை உற்பத்தி மற்றும் ஏற்றுமதி மையமாகத் திருப்பூர் விளங்குகிறது. இங்கு ஏராளமான ஏற்றுமதி மற்றும் உள்நாட்டு வர்த்தக நிறுவனங்கள் செயல்பட்டு வருகின்றன. பஞ்சு, நூல் விலை மாற்றங்கள், உற்பத்திச் செலவு அதிகரிப்பு, தொழிலாளர் நலன், ஏற்றுமதி வர்த்தகத்தை விரிவுபடுத்துதல் உள்ளிட்ட பல்வேறு சவால்களை இத்தொழில்துறை எதிர்கொண்டு வருகிறது.

இந்தப் பிரச்சினைகளுக்குத் தீர்வு காணவும், பின்னலாடைத் தொழில்துறையின் வளர்ச்சியை ஒருங்கிணைக்கவும், அரசு மற்றும் தொழில்துறையினர் பங்கேற்கும் வகையில் தனி வாரியம் அமைக்க வேண்டும் என்பது நீண்டகாலக் கோரிக்கையாக இருந்து வருகிறது.

அறிவிப்பும் தற்போதைய நிலையும்

இதுகுறித்து, கைத்தறி மற்றும் ஜவுளித்துறை மானியக் கோரிக்கையின்போது, அரசு பிரதிநிதிகள் மற்றும் தொழில்துறைப் பங்களிப்பாளர்கள் இடம்பெறும் வகையில் ‘தமிழ்நாடு பின்னலாடை வாரியம்’ என்ற தனித்துவமான அமைப்பு உருவாக்கப்படும் என அமைச்சர் விஜய் பாலாஜி அறிவித்தார். மேலும், ஏற்றுமதி வர்த்தகத்தை மேம்படுத்தும் நோக்கில், ஆண்டுக்கு நான்கு முறை உற்பத்தியாளர்கள், விற்பனையாளர்கள் மற்றும் வர்த்தகர்கள் பங்கேற்கும் சந்திப்பு நிகழ்ச்சிகள் நடத்தப்படும் என்றும் தெரிவித்தார்.

இந்த அறிவிப்பு தொழில்துறையினரிடையே எதிர்பார்ப்பை ஏற்படுத்தின. இருப்பினும், வாரியம் அமைப்பதற்கான நடவடிக்கைகள் இன்னும் நடைமுறைக்கு வராததால், அதன் கட்டமைப்பு, செயல்பாடுகள், பிரதிநிதித்துவம் மற்றும் செயல்பாட்டுக்கான காலக்கெடு குறித்த தெளிவு தொழில்துறையினருக்குத் தேவைப்படுகிறது.

பின்னலாடைத் தொழில்துறையில் ஏற்படும் பிரச்சினைகளுக்குத் தீர்வு காண்பதற்காக, அரசு துறைகளையும் தொழில்துறையினரையும் ஒருங்கிணைக்கும் அமைப்பு அவசியமாகக் கருதப்படுகிறது. வாரியம் அமைக்கப்பட்டால், பஞ்சு மற்றும் நூல் விலை உயர்வு, உற்பத்திச் செலவு அதிகரிப்பு, தொழிலாளர் நலன், ஏற்றுமதி வர்த்தகச் சவால்கள் உள்ளிட்ட பிரச்சினைகளை அரசின் கவனத்துக்குக் கொண்டு சென்று, அவற்றுக்குத் தீர்வு காண்பதற்கான ஒருங்கிணைந்த முயற்சிகளை மேற்கொள்ள வாய்ப்பு ஏற்படும்.